საქართველოს საგანმანათლებლო სივრცეში ფსიქოლოგიის მიმართულებით საერთაშორისო პარტნიორობა იწყება. აღმოსავლეთ ევროპის უნივერსიტეტსა (EEU) და იტალიის საგანმანათლებლო-კვლევით ცენტრს — მილანის კათოლიკას უნივერსიტეტს (Università Cattolica del Sacro Cuore) შორის ურთიერთთანამშრომლობის მემორანდუმი გაფორმდა. თანამშრომლობის ფარგლებში, მომხმარებელთა ქცევისა და ჯანმრთელობის ფსიქოლოგიის (Consumer Behaviour & Health Psychology) მიმართულებით პირველი ევროპული ორმაგი დიპლომები გაიცემა.
მხარეთა შორის მიღწეული შეთანხმება რამდენიმე მიმართულებას აერთიანებს:
-
სამაგისტრო საფეხური: მომხმარებელთა ქცევისა და ჯანმრთელობის ფსიქოლოგიის ერთობლივი სამაგისტრო პროგრამის შემუშავება და დანერგვა;
-
საბაკალავრო საფეხური: ფსიქოლოგიის მიმართულებით სტუდენტების გაცვლითი პროგრამების განხორციელება და ორმაგი ხარისხის მინიჭება;
- ამასთან ერთად, მხარეები შეთანხმდნენ გაცვლითი პროგრამები განხორციელდეს მენეჯმენტისა და ბიზნესის ადმინისტრირების მიმართულებით.
ფსიქოლოგიის მიმართულებით აღნიშნული ინიციატივა უნიკალურია ქართული უმაღლესი განათლების სისტემისთვის, რადგან ეს არის პირველი შემთხვევა, როდესაც ქართველ სტუდენტებს შესაძლებლობა ეძლევათ ისეთ ინტერდისციპლინურ სფეროში, როგორიც არის ფსიქოლოგია, ქართული და ევროპული დიპლომები მიიღონ.
მემორანდუმს ხელი მილანში გამართული ოფიციალური ვიზიტის ფარგლებში მოეწერა. სადაც ქართული დელეგაცია იტალიური უნივერსიტეტის მოწვევით იმყოფებოდა, სამუშაო შეხვედრები განათლებისა და ფსიქოლოგიის ფაკულტეტის, ცენტრალური ადმინისტრაციის წარმომადგენლებთან და ხელმძღვანელ პირებთან გაიმართა.
აღმოსავლეთ ევროპის უნივერსიტეტის რექტორის დავით ჩერქეზიშვილის განცხადებით: „უნივერსიტეტისთვის განსაკუთრებით მნიშვნელოვან პრიორიტეტს წარმოადგენს მსოფლიოში წამყვან უნივერსიტეტებთან აქტიური თანამშრომლობით გავაფართოვოთ სტუდენტების განვითარების შესაძლებლობები და მუდმივ პროცესში ვახორციელებდეთ განათლების ხარისხის ზრდის პროცესს.“
მომხმარებელთა ქცევის ფსიქოლოგია დღეს მსოფლიოში ერთ-ერთი ყველაზე დინამიკური და მოთხოვნადი დარგია, რომელიც კრიტიკულ როლს ასრულებს თანამედროვე ინდუსტრიების განვითარებაში. პროგრამის ფარგლებში მომზადებული კადრები უზრუნველყოფენ შრომის ბაზრის დეფიციტური სექტორების შევსებას: ჯანდაცვასა და საზოგადოებრივი ჯანმრთელობის პოლიტიკაში; ბიზნესსა და მარკეტინგში – მომხმარებელზე ორიენტირებული სერვისებისა და პროდუქტების განვითარებისთვის; ციფრულ ტექნოლოგიებში – მომხმარებლის გამოცდილების ანალიზისა და ქცევითი მოდელირებისთვის და ა.შ.;
პროექტის უნიკალურობას განაპირობებს პარტნიორი მხარის მასშტაბიც: Università Cattolica del Sacro Cuore იტალიის ერთ-ერთი ყველაზე გავლენიანი საგანმანათლებლო-კვლევითი ცენტრია, რომელიც ფსიქოლოგიის, მედიცინისა და სოციალური მეცნიერებების მიმართულებით უმაღლესი დონის აკადემიური სკოლებით გამოირჩევა.
აღმოსავლეთ ევროპის უნივერსიტეტი ამ თანამშრომლობით ქართულ საგანმანათლებლო სივრცეში კიდევ უფრო მეტად აძლიერებს აკადემიურ მიმართულებას და თანმიმდევრულად ახორციელებს უნივერსიტეტის სტრატეგიას – განავითაროს საუკეთესო საერთაშორისო პრაქტიკაზე დაფუძნებული სტუდენტზე ორიენტირებული საგანმანათლებლო გარემო და მისცეს უნივერსიტეტის სტუდენტებსა და აკადემიურ პერსონალს საერთაშორისო მობილობისა და გლობალურ სამეცნიერო ქსელებში ინტეგრაციის ფართო შესაძლებლობები.