აღმოსავლეთ ევროპის უნივერსიტეტის იურიდიულ და სოციალურ მეცნიერებათა ფაკულტეტის აფილირებული აკადემიური პერსონალისა და სტუდენტების საყურადღებოდ!
გამოიყენეთ შესაძლებლობა და გახდით თქვენი ფაკულტეტის წარმომადგენელი უნივერსიტეტის წარმომადგენლობით საბჭოში!
ცხადდება კონკურსი აღმოსავლეთ ევროპის უნივერსიტეტის წარმომადგენლობით საბჭოში იურიდიულ და სოციალურ მეცნიერებათა ფაკულტეტის წარმომადგენელი 1 (ერთი) აკადემიური პერსონალის წევრისა და 1 (ერთი) სტუდენტი წევრის არჩევის მიზნით.
აღმოსავლეთ ევროპის უნივერსიტეტის წარმომადგენლობითი საბჭო არის უნივერსიტეტის უმაღლესი წარმომადგენლობითი ორგანო, დამოუკიდებელი მმართველი კოლეგიური სტრუქტურული ერთეული.
საბჭოს მიზანია ხელი შეუწყოს უნივერსიტეტის ეფექტურ მართვასა და განვითარებას, უზრუნველყოს უნივერსიტეტის სტრატეგიული საკითხების კოლეგიური გადაწყვეტა, უნივერსიტეტის მართვისა და საქმიანობის ღიაობა, გამჭვირვალობა და მასში საუნივერსიტეტო საზოგადოების ჩართულობა.
წარმომადგენლობითი საბჭოს აკადემიური პერსონალის წევრი და სტუდენტი წევრი აირჩევიან იურიდიულ და სოციალურ მეცნიერებათა ფაკულტეტის საბჭოს მიერ.
აკადემიური პერსონალის წევრობის მსურველი ვალდებულია დადგენილი წესითა და ვადებში წარადგინოს დასაბუთებული განცხადება. ფაკულტეტის საბჭო განიხილავს წარმოდგენილ დასაბუთებულ განცხადებებს და აფასებს კანდიდატების კონცეფციას/ხედვას აღმოსავლეთ ევროპის უნივერსიტეტის განვითარებასთან დაკავშირებით. ფაკულტეტის საბჭო ასევე უფლებამოსილია, სურვილის შემთხვევაში, გაესაუბროს კანდიდატებს წარმომადგენლობითი საბჭოს საქმიანობაში მათი როლის შესახებ.
სტუდენტი წევრობის მსურველი ვალდებულია დადგენილი წესითა და ვადებში წარადგინოს განცხადება, რომლითაც უნდა დაასაბუთოს, რატომ იქნება მისი როლი მნიშვნელოვანი და შედეგიანი წარმომადგენლობითი საბჭოს საქმიანობაში. ამასთანავე, კანდიდატმა უნდა დაადასტუროს კონფერენციებსა და საუნივერსიტეტო სტუდენტურ აქტივობებში აქტიური ჩართულობა.
ფაკულტეტის საბჭო განიხილავს წარმოდგენილ დასაბუთებულ განცხადებებს, აფასებს კანდიდატების მოტივაციასა და საუნივერსიტეტო სტუდენტურ ცხოვრებაში ჩართულობას და უფლებამოსილია, სურვილის შემთხვევაში, გაესაუბროს კანდიდატებს. ფაკულტეტის საბჭო სხდომაზე კენჭისყრის გზით იღებს გადაწყვეტილებას იმ კანდიდატის სასარგებლოდ, რომლის მონაწილეობასაც წარმომადგენლობითი საბჭოს საქმიანობაში მიიჩნევს პროდუქტიულად.
