2026 წლის 26 ივნისს, აღმოსავლეთ ევროპის უნივერსიტეტში, სტუდენტური კლუბი Neurozeal-ისა და ჯანდაცვის მეცნირებათა ფაკულტეტის ორგანიზებით სტუდენტური კონფერენცია-ვორქშოპი „Brain and Beyond’26 – აუტიზმი კლინიკური ნეირომეცნიერებების პერსპექტივიდან“ გაიმართა. ღონისძიება აუტისტური სპექტრის აშლილობების თანამედროვე კლინიკურ და ნეირომეცნიერულ ასპექტებს მიეძღვნა.
კონფერენციის მონაწილეებს აღმოსავლეთ ევროპის უნივერსიტეტის რექტორი, პროფესორი დავით ჩერქეზიშვილი, ჯანდაცვის მეცნიერებათა ფაკულტეტის დეკანის მ/შემსრულებელი, ასისტენტ-პროფესორი ელენე ზურაბიშვილი და სტუდენტური კლუბი Neurozeal-ის პრეზიდენტი მოჰამედ აატირ შაიხი მიესალმნენ. ღონისძიების ფარგლებში, აუდიტორიის წინაშე ასევე ასოცირებული პროფესორი გიორგი წიკლაური და ასისტენტ-პროფესორი თეონა ირემაძე მთავარი მოხსენებებით წარდგნენ.
კონფერენციაში მონაწილეობა აღმოსავლეთ ევროპის უნივერსიტეტისა და სხვა უნივერსიტეტების დიპლომირებული მედიკოსის პროგრამების 20-ზე მეტმა სტუდენტმა მიიღო. წარმოდგენილი მოხსენებები შეეხებოდა აუტიზმის სხვადასხვა აქტუალურ მიმართულებას, მათ შორის ნეირობიოლოგიას, ფუნქციურ ნეიროვიზუალიზაციას, ქცევით მეცნიერებებს, მეტაბოლურ რისკებს, ხელოვნური ინტელექტის გამოყენებას ადრეულ დიაგნოსტიკაში, ძილის დარღვევებსა და ფსიქიკური ჯანმრთელობის თანმხლებ მდგომარეობებს.
გარდა პრეზენტაციების სესიისა, ღონისძიება ასევე ინტერაქტიულ კლინიკურ აქტივობას „Autism in Practice“ მოიცავდა, რომლის ფარგლებში მონაწილეებს საშუალება ჰქონდათ გაცნობოდნენ აუტისტური სპექტრის აშლილობის მულტიდისციპლინურ შეფასებას, დიაგნოსტიკასა და მართვას. აქტივობაში განხილული იყო პედიატრისა და ფსიქოლოგის მიმართულებით კლინიკური შემთხვევები.
ღონისძიება შეჯამებითა და მონაწილეებისთვის სერტიფიკატების გადაცემით დასრულდა. კონფერენციამ კიდევ ერთხელ გაუსვა ხაზი აღმოსავლეთ ევროპის უნივერსიტეტის მიერ სტუდენტური სამეცნიერო საქმიანობის, ინტერდისციპლინური კვლევებისა და აკადემიური თანამშრომლობის განვითარების მიმართულებით მხარდაჭერას.
