გამოფენა მიზნად ისახავდა საქართველოს, როგორც საგანმანათლებლო ჰაბის წარდგენას და საქართველოში სწავლის გაგრძელების მსურველთათვის უმაღლესი საგანმანათლებლო დაწესებულებების პროგრამების, შეთავაზებებისა და სხვა შესაძლებლობების გაცნობას.
გამოფენა გახსნა ინდოეთში საქართველოს საგანგებო და სრულუფლებიანმა ელჩმა, ბატონმა არჩილ ძულიაშვილმა. მან სიტყვით გამოსვლისას ისაუბრა საქართველოში განათლების სექტორის პოტენციალსა და განათლების საერთაშორისო გამოფენის მნიშვნელობაზე საერთაშორისო სტუდენტებისთვის ქართულ უმაღლეს განათლებაზე ხელმისაწვდომობის გაზრდის მიზნით.
აღმოსავლეთ ევროპის უნივერსიტეტის სახელით გამოფენაში მონაწილეობა მიიღეს უნივერსიტეტის რექტორის მოვალეობის შემსრულებელმა, კახაბერ ლაზარაშვილმა, ვიცე-რექტორმა საერთაშორისო და ადმინისტრაციულ საკითხებში, თეა იმედაძემ და ჯანდაცვის მეცნიერებათა ფაკულტეტის დეკანის მოადგილემ, ელენე ზურაბიშვილმა.
გამოფენის პარალელურად გაიმართა პრეზენტაციები. EEU-ს წარმომადგენლებმა დაინტერესებულ პირებს გააცნეს უნივერსიტეტის საგანმანათლებლო პროგრამები, უპირატესობები და შეთავაზებები.
გამოფენას ესწრებოდნენ საქართველოში სწავლის გაგრძელების მსურველები, ადგილობრივი უნივერსიტეტების წარმომადგენლები და მომზიდავი კომპანიები როგორც ინდოეთიდან, ასევე სხვა აზიური ქვეყნებიდან.
აღსანიშნავია, ეს იყო ქვეყნის ფარგლებს გარეთ საქართველოს განათლების პირველი გამოფენა, რომელშიც 16 ქართული უნივერსიტეტი ერთობლივად მონაწილეობდა.
გამოფენამ წარმატებით ჩაიარა და დამსწრე საზოგადოების დიდი დაინტერესება გამოიწვია. შესაბამისად, დაიგეგმა, გამოფენას რეგულარული სახე მიეცეს და მომავალში ინდოეთის რამდენიმე რეგიონში გაიმართოს.
აღმოსავლეთ ევროპის უნივერსიტეტი მადლობას უხდის საქართველოს საელჩოს და ელჩს, ბატონ არჩილ ძულიაშვილს გამოფენის ორგანიზებისა და მხარდაჭერისთვის!
