კვლევითი ერთეულის პერსონალი

ბესარიონ ტატიშვილი (ასოცირებული პროფესორი)

არქიტექტურის დოქტორი;

მიმართულება: არქიტექტურა

შპს „ბესტარქიტექტურის“ დირექტორი

ბესარიონ ტატიშვილი არის აღმოსავლეთ ევროპის უნივერსიტეტის ბიზნესისა და ინჟინერიის ფაკულტეტის ასოცირებული პროფესორი. იგი აქტიურად ეწევა პედაგოგიურ და სამეცნიერო საქმიანობას და აქვს მრავალწლიანი პრაქტიკული გამოცდილება არქიტექტურის სფეროში. სხვადასხვა წლებში მუშაობდა ქალაქგაფორმების სამმართველოში, ინგლისურ კომპანია B&V-ში და კომპანია „იბერია კონსტრაქშენში“, ასევე ხელმძღვანელობდა შპს „კურორტმშენის“ არქიტექტურულ სტუდიას. 2006 წლიდან დღემდე არის შპს „ბესტარქიტექტურის“ დირექტორი.

2011–2021 წლებში იყო საქართველოს არქიტექტორთა კავშირის გამგეობის წევრი და ეთიკის კომისიის თავმჯდომარე. არის არაერთი არქიტექტურული კონკურსის ლაურეატი, მათ შორის „ოქროს კაპიტელისა“ და „წლის საუკეთესო პროექტის“ კონკურსების პრიზიორი.

ბელა თინიკაშვილი (პროფესორი)    

არქიტექტურის დოქტორი;
მიმართულება: არქიტექტურა;                                                                                                     

საქართველოს არქიტექტორთა კავშირის წევრი

ბელა თინიკაშვილი არის საქართველოს არქიტექტორტთა კავშირის გამგეობის წევრი,  აღმოსავლეთ ევროპის უნივერსიტეტის არქიტექტურის საბაკალავრო პროგრამის ხელმძღვანელი. აქტიურად ეწევა პედაგოგიურ და პროფესიულ საქმიანობას. გასულ წლებში იყო  სამშენებლო კომპანიების –  ,,სევენ სკაი’’,  ააიპ ,,ინჟინრული აზრი’’, არქიტექტურული საპროექტო კომპანიების –  ,,მოდულიონი’’ და  ,,ხური XXI’’-ის არქიტექტორი.

ბელა თინიკაშვილს გამოქვეყნებული აქვს არაერთი სამეცნიერო ნაშრომი. არის ადგილობრივი და საერთაშორისო კონფერენციების მონაწილე, მათ შორის ამერიკისმცოდნეობის ყოველწლიური საერთაშორისო კონფერენციების. მისი ინტერესის სფეროა: ეკოლოგიური არქიტექტურა და განახლებადი ენერგიების გამოყენება არქიტექტურაში.

რევაზ ხასია (პროფესორი)  

მიმართულება: არქიტექტურა

რევაზ ხასიას აქვს მრავალწლიანი პროფესიული და პედაგოგიური საქმიანობის გამოცდილება. ის არის სსიპ-განათლების ხარისხის განვითარების ეროვნული ცენტრის მიერ გამოცემული არქიტექტორ-ტექნიკოსის სახელმძღვანელოს თანაავტორი. აქტიურად მონაწილეობს სხვადასხვა პროექტებში, არქიტექტურულ – შემოქმედებით კონკურსებში, გამოფენებსა და სიმპოზიუმებში. მას მიღებული აქვს I პრიზი – საერთაშორისო გამოფენა-კონკურსში  “ოლიმპიადა“, გრანპრი ქანდაკებაში – საერთაშორისო გამოფენა “ცისფერი “გალერეა, სამგზის I პრიზი საერთაშორისო საშობაო ფესტივალი “ცისფერი“ გალერეა, გრანპრი -ნამუშევარი “მუზა” სკულპტურის საერთაშორისო სიმპოზიუმში (ქ.ნადიოტადი, უნგრეთი). ქართული სახვითი ხელოვნების განვითარებაში წვლილისთვის მას მიენიჭა საქართველოს დამსახურებული მხატვრის საპატიო წოდება. ის წლების განმავლობაში საქართველოს სხვადასხვა უმაღლეს საგანმანათლებლო დაწესებულებებში ეწეოდა პედაგოგიურ საქმიანობას.

მერაბ ბოლქვაძე (პროფესორი)  

არქიტექტურის დოქტორი;
მიმართულება: არქიტექტურა;

მერაბ ბოლქვაძე არის აღმოსავლეთ ევროპის უნივერსიტეტის ბიზნესისა და ინჟინერიის ფაკულტეტის პროფესორი და არქიტექტურის საბაკალავრო პროგრამის ხელმძღვანელი. მრავალწლიანი პროფესიული და პედაგოგიური გამოცდილების მქონე არქიტექტორი, წლების განმავლობაში ხელმძღვანელობდა „თბილქალაქპროექტის“ ქალაქგეგმარების სამმართველოს და ამჟამად მუშაობს სპს „ტერიტორიათა განვითარების სააგენტო თბილქალაქპროექტში“ ქალაქმშენებლად და არქიტექტორად.

მისი ხელმძღვანელობით განხორციელდა მრავალი მნიშვნელოვანი პროექტი: ზუგდიდისა და მცხეთის მიწათსარგებლობის გენერალური გეგმები, თბილისის განაშენიანების რეგულირების კომპლექსები, დიდი დიღმისა და ვარკეთილი-3-ის რაიონების განაშენიანება, ავჭალის გზატკეცილის რეკონსტრუქცია, მრავალი სასტუმრო და მრავალფუნქციური შენობა, ასევე საერთაშორისო პროექტები ქ. ბენღაზსა და ქ. სოჭში.

მერაბ ბოლქვაძე არის მრავალი ეროვნული და საერთაშორისო კონკურსის გამარჯვებული, საქართველოს არქიტექტორთა კავშირის პრემიის მფლობელი, საერთაშორისო კონკურსის ბრინჯაოს მედლის მფლობელი „ქ. თბილისის ურბანული განვითარების კონცეფციაზე“ და I პრემიის მფლობელი თბილისის მიწათსარგებლობის გენერალური გეგმის განახლების პროექტში. აღსანიშნავია, რომ მერაბ ბოლქვაძე არის თბილისის მოქმედი მიწათსარგებლობის გენერალური გეგმის ავტორი.

პავლე სახანბერიძე (ასოცირებული პროფესორი)

არქიტექტურის დოქტორი

მიმართულება: არქიტექტურა

პავლე სახანბერიძე არის არქიტექტურის დოქტორი და აღმოსავლეთ ევროპის უნივერსიტეტის ბიზნესისა და ინჟინერიის ფაკულტეტის ასოცირებული პროფესორი. მისი მრავალწლიანი პროფესიული და აკადემიური საქმიანობა მოიცავს არქიტექტურის, დიზაინის მენეჯმენტის და ურბანული დაგეგმარების მიმართულებებს.

იგი აქტიურად არის ჩართული უმაღლესი განათლების სფეროში და ახორციელებს პედაგოგიურ საქმიანობას არქიტექტურისა და ინჟინერიის მიმართულებებით. მისი აკადემიური საქმიანობა ორიენტირებულია სტუდენტთა პროფესიულ განვითარებაზე, თანამედროვე მეთოდოლოგიების დანერგვასა და არქიტექტურულ-საინჟინრო განათლების განვითარებაზე.

პავლე სახანბერიძეს აქვს მრავალწლიანი გამოცდილება არქიტექტურული და საინჟინრო პროექტების მართვის სფეროში. 2014 წლიდან ხელმძღვანელობს შპს „პროექტების განვითარების ფონდს“. სხვადასხვა პერიოდში მუშაობდა წამყვან არქიტექტორად, მთავარ არქიტექტორად, დიზაინ მენეჯერად, ხარისხის მართვისა და კონტროლის მიმართულების ხელმძღვანელად და სივრცით მგეგმარებლად. მისი პროფესიული საქმიანობა მოიცავს როგორც კერძო სექტორში განხორციელებულ არქიტექტურულ პროექტებს, ასევე საჯარო სექტორში სივრცითი დაგეგმარებისა და ურბანული განვითარების პროცესებში მონაწილეობას.

მისი კვლევითი და პროფესიული ინტერესები მოიცავს არქიტექტურულ მენეჯმენტს,  ხარისხის მართვის სისტემებს, ციფრულ (BIM) მოდელირებასა და ურბანულ განვითარებას.

პავლე სახანბერიძე აქტიურად მონაწილეობს სამეცნიერო კონფერენციებში, პროფესიულ ვორქშოპებსა და საერთაშორისო აკადემიურ ღონისძიებებში. მისი კვლევითი საქმიანობა და მოხსენებები დაკავშირებულია არქიტექტურული პროექტების ხარისხის მართვის, ციფრული ტექნოლოგიების გამოყენებისა და კრიტიკული ინფრასტრუქტურის უსაფრთხოების თანამედროვე საკითხებთან.

ეკა ჩხაიძე (ასისტენტი)

მიმართულება: არქიტექტურა

ეკა ჩხაიძე არის არქიტექტორი, რომელიც 1997 წლიდან საქმიანობს არქიტექტურული პროექტირების სფეროში. პროფესიული კარიერის განმავლობაში მუშაობდა როგორც სახელმწიფო, ისე კერძო საპროექტო ორგანიზაციებში, სადაც მონაწილეობდა სხვადასხვა დანიშნულებისა და მასშტაბის არქიტექტურული პროექტების შემუშავებაში. სხვადასხვა წლებში თანამშრომლობდა შპს „ნ. ლაღიძის“ შემოქმედებით სტუდიასთან, საქართველოს რკინიგზის დეპარტამენტთან, შპს „დელტაპროექტი-2000“-თან, შპს „არტსტუდიო პროექტთან“, ასოციაცია „ატუსთან“, შპს „ბურჯთან“, შპს „სპექტრთან“ და საქართველოს საერთაშორისო არქიტექტურისა და სამშენებლო-საპროექტო კომპანიასთან. 2017 წლიდან საქმიანობს, როგორც დამოუკიდებელი არქიტექტორი.

2003 წელს, როგორც „ბათუმის რკინიგზის სადგური 150 მგზავრზე“ პროექტის თანაავტორი, არქიტექტორთა კავშირის მიერ ორგანიზებულ კონკურსში „წლის საუკეთესო პროექტი“ პირველი ხარისხის დიპლომით დაჯილდოვდა. 2009 წელს მიიღო მეორე ხარისხის დიპლომი რუსთავის მერიის მიერ გამოცხადებულ ახალგაზრდობის ხეივნის რეკონსტრუქციის კონკურსში.

პროფესიულ საქმიანობასთან ერთად, 2026 წლიდან არის აღმოსავლეთ ევროპის უნივერსიტეტის ბიზნესისა და ინჟინერიის ფაკულტეტის ასისტენტი, სადაც ჩართულია სასწავლო პროცესში.

პროფესიული განვითარების ფარგლებში მონაწილეობა აქვს მიღებული საერთაშორისო პროფესიულ ღონისძიებებში, მათ შორის არქიტექტორთა კავშირების საერთაშორისო ასოციაციის (МАСА) კონფერენციასა და შავი ზღვის აუზის ქვეყნების არქიტექტორთა ფორუმში (FABSR).