აღმოსავლეთ ევროპის უნივერსიტეტში (EEU) რიგით მესამე, მოსწავლეთა და სტუდენტთა ერთობლივი კონფერენცია „ახალგაზრდები და მომავლის განათლება – გზავნილი ხელოვნური ინტელექტის (AI) ეპოქიდან“ განათლების მეცნიერებების ფაკულტეტის ორგანიზებით გაიმართა. კონფერენციაში მონაწილეობა 100-ზე მეტმა პირმა, მათ შორის, 20-ზე მეტმა სკოლის მოსწავლემ და სხვადასხვა უნივერსიტეტის სტუდენტებმა მიიღეს.
კონფერენცია მიზნად ისახავდა ახალგაზრდების – სკოლის მოსწავლეებისა და უნივერსიტეტის სტუდენტების აქტიური ერთობლივი ჩართულობის ხელშეწყობას, სამეცნიერო თანამშრომლობის სტიმულირებას, რაც მათ საშუალება მისცა ერთმანეთისთვის გაეზიარებინათ გამოცდილება, განეხილათ თანამედროვე განათლების ძირითადი გამოწვევები და მათი გადაჭრის ინოვაციური გზები ხელოვნური ინტელექტის ეპოქაში. კონფერენცია ასევე ემსახურებოდა განათლების სისტემის გაუმჯობესებაზე ორიენტირებული იდეების წარმოჩენასა და მომავალი თაობის მკვლევართა პროფესიულ გაძლიერებას.
კონფერენცია გახსნა განათლების მეცნიერებების ფაკულტეტის დეკანმა ქეთევან აფთარაშვილმა. მონაწილეებს და დამსწრე აუდიტორიას, ასევე მიესალმნენ ბიზნესისა და ინჟინერიის ფაკულტეტის დეკანი ვასილ კიკუტაძე, იურიდიულ და სოციალურ მეცნიერებათა ფაკულტეტის დეკანის მოადგილე ზუხრა მაცაბერიძე.
